CEBU, Philippines - Bisan ordinaryong manindahay og pungko-pungko nga magtraysikad wala palabya sa mga tulisang magmotorsiklo diha sa dalan UN Avenue sa Barangay Umapad, dakbayan sa Mandaue alas-10 pasado ang takna sa miaging gabii.
Si PO1 Melvin Pelayo sa kapolisan sa Presinto 5 sa Mandaue City Police Office (MCPO) miila sa biktima nga mao si Jerson Bontilao, 26 anyos, taga Pusok, Dakbayan sa Lapu-Lapu.
Nagkurog pa sa kahadlok nga misaysay si Bontilao sa mga polis sa pagsaysay nga kalit siyang gihunongan og motorsiklo nga may duha ka wala hiilhing lalaki nga iyaha pang gitimbaya sa pagtuo nga mangaon ang duha.
Ang biktima namaligya og gimantikaan nga hiniwang manok nga giputos sa harina nga parisan og puso.
Apan nakugang siya sa tubag sa angkas nga miingon: “tulis ni part, ayaw pagpalag, ambi na ang imong belt bag nga gisudlan nimo sa imong halin!â€
Ang biktima nga nagtan-aw sa sumbohan sa armas nga gition kaniya pwerteng hadloka ug wala na siya motubag ug dali niyang gitangtang ang belt bag nga may sud nga halin nga P2 mil ug gihatag ngadto sa mga tulisan. (BANAT NEWS)