Tulo patay sa aksidente sa dalan

CEBU, Philippines - Tulo ang patay sa managlahing aksidente sa kadalanan sa lalawigan sa Sugbo sa miaging adlaw.

Patay si Eleuteria Condor, 85 molupyo sa Canhabagat, Medellin human kini mabanggai og motor nga gimaneho ni Santiago Pino, 31, nga taga Daanbantayan pasado alas 6:00 sa miaging buntag.

Matud pa nga nagmaneho sa motor ang suspetsado ug nabanggaan niya ang biktima hinungdan nga nalabay kini nga miresulta sa iyang kamatayon.

Ang biktima nakaangkon og kadaot sa tuo nga bahin sa iyang lawas nga maoy hinungdan sa iyang hinanali nga kamatayon sumala pa sa municipal health officer sa Medellin nga si Dr. Nicodemus Jabel Jr.

Samtang patay ang usa ka drayber sa motor human kini makaligis og iro nga milabang sa karsada pasado alas 3:00 sa miaging kaadlawon sa barangay Taboc sa dakbayan sa Danao. Ang namatay naila nga si John Mark Gonzales, 23, nga trabahante sa usa ka fastfood chain.

Matud pa nga tungod sa kakusog sa impact sa pagbangga nadiretso sa punoan sa nangka ang motor nga gimaneho ni Gonzales.   Nadala pa sa tambalanan si Gonzales apan pipila ka oras namatay kini.

Samtang patay ang usa ka lalaki nga gikan  nanari  human kini naligsan sa usa ka prime mover sa barangay Guiwang sa lungsod sa Alcoy pasado alas 5:00 sa miaging hapon.  Ang naligsan naila nga si Anecito Medellin, 61, molupyo sa Daanlungsod sa Alcoy.

Samtang ang drayber sa prime mover naila nga si Necky Bayo, 26, nga taga Bais City, Negros Occidental.

Base sa imbestigasyon sa kapolisan nga ang biktima naglakaw padulong sa iyang balay gikan sa buwangan sa barangay Guiwang dihang nadasmagan. Gidala sa kapolisan ang drayber ug ang trak nga iyang gimaneho ug kasamtangang gitanggong sa Alcoy Police Station samtang giandam pa ang kaso batok kaniya.  (BANAT NEWS)