Lalaki misutoy og dagan ug milayat sa pangpang patay

CEBU, Philippines - Patay na nga nadiskobrehan ang usa ka lalaki human kini modagan dayon  milayat sa usa ka pangpang sa baybayon sa barangay Montserrat, lungsod sa Pilar pasado alas 3:00 sa miaging hapon.

Ang namatay naila nga si Joel Lapiseros, 41, nga molupyo sa maong dapit.

Pasado alas 3:00 sa hapon nakadawat og tawag ang Pilar police gikan ni Kapitan Florentino Mareveles nga dunay naghikog sa iyang barangay ug napalgan kini nga patay na ubos sa pangpang.

Base sa imbestigasyon sa kapolisan, nasuta nga ang biktima mibiya sa ilang balay kauban ang iyang kapuyo nga si Betty Aragon aron moadto sa Purok 4 sa sayong buntag.

Apan dihang nakalakaw na sila pipila ka metros gikan sa ilang balay kalit lang misutoy og dagan si Lapiseros ug   nawala kini sa panan-aw sa iyang kapuyo.

Tungod sa kabalaka nga naunsa na si Lapiseros nagpatabang si Aragon sa ilang mga kaliwat pagpangita niini.

Apan pasado alas 3:00 napalgan na lang sa inahan ni Lapiseros ang iyang patay nga lawas sa baybayon.

Nabun-og ang ulo ni Lapiseros ug may dakong samad niini. Sumala pa sa nirespondeng polis nga pinangulohan ni PO2 Wenceslao Daban nga posible nga naghikog si Lapiseros pinaagi sa paglayat sa pangpang nga may gihabogon nga 12 ka tiil.

Gituohan nga didto mitugpa sa bato-on nga bahin si Lapiseros nga nag-una ang ulo hinungdan sa iyang kamatayon.

Aron malikayan ang pagduda nga dunay foul play ang kamatayon ni Lapiseros gitambagan sa kapolisan ang pamilya niini nga magpahigayon og autopsy sa iyang patay nga lawas.  (BANAT NEWS)