Binandol nga marijuana nasakmit

CEBU, Philippines - Usa ka lalaki nga giingong level one drug pusher nasikop sa City Intelligence Branch sa buy-bust operation sa barangay Inayawan lakip na sa laing walo ka tawo nga nasakmitan og kapin sa tunga sa milyon nga drugas sa miaging hapon.

Ang nasikop naila nga si  Henry Monterde, sa Sambag I, nga maoy subject sa buy-bust operation lakip na si Epe Torrejas, 24, taga Barangay Inayawan, nga nagpailang pag-umangkon sa usa ka kanhi kongresista ug clerk sa security agency sa maong kanhi magbabalaod.

Nasikop usab sila si Efren Satore, 36, taga Sibonga, Cebu, Vincent Blarusan, 21, Andrey Insila, 19, Ramil Delbo, Nelson Cantutay, 48,  taga Barangay Inayawan,  Felix Tabal, 22, sa Bulacao ug  Mike Delicano, 18, nga taga Pardo.

Si Supt. Romeo Santander, hepe sa CIB, nga nahinabi sa Banat News miingon nga sukad pa niadtong Sabado nila gi-monitor si Monterde ug dihang positibo ang impormasyong ilang nadawat gipahigayon dayon ang buy-bust operation niadtong Biyernes sa hapon.

Narekober sa kapolisan ang 24 ka bundle sa pinauga nga dahon sa marijuana nga motimbang og kapin usa ka kilo ang matag usa;  15, 000 ka linikit na nga  marijuana; usa ka medium pack nga gituohang shabu; drug paraphernalia ug usa ka kalibre nga .38 revolver nga may upat ka bala.

Matud pa ni Santander nga kun mahalin na ang maong mga drugas mokabat kini og P510, 000.

Dugang ni Santander nga naglisod sila sa pagsulod sa maong drug den tungod kay hagip-ot kaayo ang dalan ug duna pay closed-circuit television (CCTV) camera ang balay. Sumala pa ni Santander nga level one drug pusher si Monterde apan sinaligan lang kini sa usa ka drug personality nga naa sa listahan sa CIB.

Si Monterde nga nahinabi sa Banat News miingon nga igo lang siya miagi sa maong dapit ug nahibulong siya nga gitawag siya sa polis ug gipasaka sa balay. Matud pa ni Monterde nga dihang misaka na siya didto na giplastar sa mga polis ang mga ebidensya.

Sumala pa ni Santander, base sa pagbanabana sa PNP Crime Laboratory-7, ang maong gidaghanon sa pinaugang Marijuana matanom sa usa ka ektaryang luna.

Si Monterde mag-atubang og kasong kalapasan sa Comprehensive Dangerous Drugs Act of 2002 lakip na sa walo ka mga nasikop ug mag-atubang pa gyud si Monterde og kasong kalapasan sa Comprehensive Law on Weapons and Ammunitions. (BANAT NEWS)