Nasunogan dili na pabalikon

CEBU, Philippines - Dili na pabalikon pagtukod sa ilang panimay ang mga nasunogan sa sitio Tinago, Barangay Alang-Alang, dakbayan sa Mandaue.

Gipahibawo ni City Social Welfare Officer Violita Cavada ang konseho sa dakbayan nga dili na mosugot ang tag-iya sa luna nga pabalikon ang mga nasunogan.

Ang maong kasayuran nakapahingawa pagsamot sa mga biktima sa sunog sanglit nawagtangan na sila og balay ug kabtangan, dili pa gyud sila makabalik pagtukod sa ilang panimay sa maong luna.

Matud ni Cavada nga sagad sa mga biktima wala gyud makahipos sa ilang mga kabtangan tungod kay atol sa maong hitabo maoy ilang gipalabi sa pagluwas ang gagmay’ng mga bata ug senior citizens.

Giduso ni Cavada ang gahin nga mokabat sa P66,000 nga maoy ibayad sa tulo ka adlaw nga pagkaon nga gihatag sa ilang buhatan ngadto sa mga biktima nga giaprobahan usab sa konseho. Gipaubos sa state of calamity ang nahisgutang lugar human sa pagkasunog sa 16 ka panimalay nga may 48 ka pamilya ang apektado. (BANAT NEWS)