USC project gisusi sa EMB

CEBU, Philippines - Gisusi sa Environmental Management Bureau ang construction site sa University of San Carlos-Talamban campus nunot sa reklamo sa giingong hinungdan sa pagbaha sa Barangay Banilad ug Talamban.

Matud sa hepe sa EMB-7, William Coñado, nga ilang klarohon kun ang tunghaan nakakuha ba og environmental compliance certificate (ECC) nga maoy usa sa rekisitos una masugdan ang construction project.

Ang USC giingong ni-apply og ECC sa Department of Environment and Natural Resources-7 niadtong 2004 alang sa ilang building sa Fine Arts ug Architecture ug ang gihimong project karon covered gihapon sa maong ECC.

Apan sa pagbisita sa lugar nasuta sa mga sakop sa EMB-7 nga miabot sa 17 metros ang gihimong road widening sa USC sukwahi sa nalatid sa ECC nga ilang gikuha nga 8.6 metros lang.

Tungod niini kinahanglang i-update sa tunghaan ang ilang ECC tungod sa gihimong expansion. Ang USC mipasalig nga aduna silay igong detention pond nga maoy mosawod sa tubig nga modagayday gikan sa ibabaw nga bahin aron malikayan ang pagbaha.

Apan bisan pa man niini ang EMB-7 mopatawag gihapon og technical conference aron ma-finalize nila ang ilang report nunot sa gihimo nilang site inspection.

Gipasalig sa USC-Talamban campus nga andam silang motuman sa imando sa EMB7 alang sa gihimo nilang construction project.  (BANAT NEWS)