Lalaki giliog pagpusil sa silingan
CEBU, Philippines - Kritikal ang kahimtang sa usa ka tawo nga naigo sa liog dihang gipusil sa iyang silingan sa dalan Cabahug, Barangay Opao, Dakbayan sa Mandaue alas-8 pasado ang takna sa miaging Huwebes sa gabii.
Ang biktima mao si Sonny Asuncion, 39, samtang ang suspetsado nagpusil mao si Rosendo Tudtud, 57, pulos nagpuyo sa maong dapit.
Si PO1 Milven Pelayo sa kapolisan sa Presinto 5 sa Mandaue City Police Office (MCPO) miingon nga dugay na nga suod nga managsilingan ang duha apan nagkabikil.
Matud pa ni Pelayo nga nagbarog lang ang biktima sa daplin sa karsada dihang giduol ug gipusil sa liog niini.
Si Pelayo miingon sa follow up operation sa kapolisan ilang nadakpan ang maong suspetsado ug nasakmit usab ang kalibre .38 rebolber nga may upat ka bala ug duha ka kabhang niini.
Matud pa ni Pelayo nga ang suspetsado nagtingkagol na karon sulod sa ilang detention cell ug ilang pasakaan og kaso nga frustrated murder. (BANAT NEWS)
- Latest
