Duha ka bombero nangilkil, dakpan
CEBU, Philippines - Gidakop sa mga ahente sa National Bureau of Investigation (NBI) ang duha ka sakop sa Bureau of Fire Protection human masakpi nga nangilkil sa aplikante og business permit.
Sila si SFO4 Joseph Ababon ug Leonidas Benatero, pulos hingkod na ang panuigon ug mga sakop sa Cebu City Fire Department, didto madakpi sulod sa City Treasurer’s Office kaniadto’ng Miyerkules sa hapon. Gisikop sila diha nga ang mga NBI agents nakakita nga gidawat na ang sobre nga gisudlan sa P10 mil gikan ni Manilyn Mar nga maoy mireklamo.
Si City Treasurer Diwa Cuevas miingon nga ang entrapment operation nakuhaan og footage sa CCTV camera sa iyang opisina.
Si Mar nagpatabang sa NBI kay gikilkilan siya sa usa ka fire inspector nga iyang una nga giila sa ngalan nga “Toto Bilatero,†apan nahibaw-an nga mao diay si Benatero.
Ang opisina ni Mar sa Barangay Kamputhaw giadto sa Joint Inspection Team sa City Hall kaniadtong Mayo 29 tungod kay miaplay man siya og “change of address†sa iyang English School.
Midemanda si Benatero nga papaliton si Mar og dugang lima ka fire extinguishers ug ipa-refill ‘sab ang pito pa ka fire extinguishers apan adto kini palita sa tindahan sa iyang amigo.
Gituman ni Mar ug nakabayad siya’g P25,250 nga mas mahal kaayo kay sa P17 mil lang unta kun adto palita sa laing tindahan. Si Benatero nangayo na usab og P30 mil aron dili na lang pailisan ang pultahan sa fire exit sa opisina. Sa negosasyon, napaus-usan ang kantidad ngadto na lang sa P10 mil. Naapil si Ababon sa kaso kay matud pa miapil kini sa negosasyon.
Si Mayor Michael Rama nalipay sa pagkasikop sa duha ka bombero nga nangilkil apan si Fire Marshall Rogelio Bongabong Jr. nasuko kaayo sa gihimo sa iyang mga sakop. Ang duha wala magpa-interview sa media.
Ipa-imbestigar ni Bongabong ang duha aron mataktak sa serbisyo kun bug-at g’yud ang ebidensya. Ang NBI mopasaka karong adlawa og kaso nga paglapas sa Anti-Graft and Corrupt Practices Act ug Bribery sa mga dinakpan. (BANAT NEWS)
- Latest
