CEBU, Philippines - Gidakop ang upat ka mananagat nga nigamit og compressor sa pagpanagat sa may isla sa Gapasan, Day-as, Cordova niadtong Martes sa gabii.
Ang nadakpan mao sila si Felix Muñoz, 27; Samuel Degamo, 30; Jessie Terrano, 34 ug Joselito Pongcol, 22, pulos molupyo sa Couaming, Inabanga, Bohol.
Sila nadakpan sa marine watch kauban ni PO3 Samson Igot sa Cordova Police Station nga nipahigayun og patrolya sa kadagatan human nakadawat og taho nga pipila ka mananagat gikan sa laing lugar ang nisulod sa kadagatan sa Cordova lakip na sa fish sanctuary.
Nasakmit gikan sa upat ka mananagat ang compressor, lima ka kilong isda, 10-ka balyos nga makina, pump boat ug uban pa.
Ang upat mag-atubang og kasong kalapasan sa ordinansa batok pagpanagat nga walay permiso sa kagamhanan ug paggamit og kahimanan nga gidili sa pagpanagat. (BANAT NEWS)