CEBU, Philippines - Gipasalig sa Criminal Investigation and Detection Group nga luwas ang dakbayan sa Sugbo sa bisan unsang hulga sa kagubot nunot sa pagbalhin sa husay sa kasong multiple murder batok sa usa ka sakop sa Moro National Liberation Front (MNLF).
Kini ang pamahayag ni Insp. Reydian Corales, assistant team leader sa CIDG Metro Cebu nga nahinabi sa mga tigbalita.
Matud ni Corales nga ang CIDG ang nihatag og security escort sa dihang gibalhin ang akusado kagahapong adlawa sa dakbayan sa Sugbo gikan sa Parang, Sulu.
Ang akusado nga si Hamjuda Mihaji, alyas Mahang, sakop sa demolition team sa MNLF nga gikatahong tighimo og bomba sa maong grupo.
Gidakop si Mihaji niadtong Hunyo 1 sa mga sakop sa CIDG Zamboanga sa Kajatian, Indanan, Sulu.
Ang kaso gipasaka nunot sa kamatayun sa duha ka US Army ug duha ka Philippine Marines niadtong 2009 human usa ka bomba ang gipabuto daplin sa kalsada.
Si Regional Trial Court Branch 9 Judge Alexander Acosta sa Sugbo ang mohusay sa kaso batok ni Mihaji.
Si Supt. Luisito Magnaye, acting chief sa CIDG Western Mindanao, maoy mihangyo sa pagpabalhin sa dinakpan sa Sugbo alang sa seguridad sa kapolisan sa matag husay nga himoon sa Sulu.
Gipasalig ni Corales nga andam sila mohatag og seguridad sa Sugbo samtang wala’y nadawat nga hulga gikan sa mga kauban ni Mihaji. (BANAT NEWS)