CEBU, Philippines - Gisikop sa City Anti-Illegal Drugs Special Operations Task Group (CAIDSOTG) ang giilang “level 2†drug pusher sa Barangay Pulangbato, dakbayan sa Sugbo.
Nakuha gikan sa suspetsado ang gituhoang shabu balor og P100,000 alas 4 sa hapon niadtong Lunes sa Sitio Dita, Pulangbato dihang mopayuhot unta sa ilegal nga drugas.
Si Senior Insp. Eunil Avergonzado, hepe sa CAIDSOTG ug mao’y nangulo sa buy-bust operation miingon nga dako og epekto sa ilegal nga drugas sa Pulangbato ang pagkasikop ni Evangelista Rubica, 28, minyo, alyas “Ebang†nga nagpuyo sa Sitio Kadauhan, Talamban.
Matud ni Avergonzado nga tulo ka semanang gimonitor ang suspetsado nunot sa impormasyon nga ilang nadawat sa kalihukan sa pagpamaligya og drugas.
Dihang nagpositibo ang ilang gihimo nga test buy pinaagi sa poseur buyer, daling gisikop ang suspetsado kinsa wala na nakalihok human nakaplastar nang daan ang mga polis. Nakuha sa posisyon sa dinakpan ang duha ka tag P100 bill nga marked money, usa ka gamay nga paketeng shabu ug duha ka dagku nga putos sa gituohang drugas nga dunay street value nga P100 mil. Sumala pa ni Avergonzado nga usa si Rubica sa mga drug lords nga naglihok sa Pulangbato ug padayon pa usab nga gipangita ang laing unom ka kauban nga nakasibat human sa operasyon.
Gitanggong na karon sa Cebu City Police Office detention cell ang dinakpan nga mag-atubang og kasong paghupot og ilegal nga drugas. (BANAT NEWS)