Barko nga gibaradero nasunog

CEBU, Philippines -  Usa ka cargo vessel nga gibaradero diha sa Barangay Tayod, Lungsod sa Consolacion nasunog niadtong miaging gabii ug kagahapon lang sa kaadlawon napawong.

Si FO1 Cesenciano Quijano Jr. sa Consolacion Fire Station miingon nga ang nasunog mao ang MV Span Asia nga gipanag-iya sa Nagasaka Shipping Lines nga gibaradero sa maong lugar sulod sa nakalabay nga mga bulan.

Giimbestigar pa ang hinungdan sa maong sunog nga gikatahong nagsugod sa usa sa mga cabin niini nga giokupar sa mga tripulanteng nagbantay.

Tungod kay duna kini pundo nga krudo ug bunker fuel sa engine room ug gikabalak-ang maabtan sa kalayo, nagpakitabang ang kabomberohan sa Consolacion sa mga silingang mga bombero.

Gituohan nga kandila nga naupos o natumba sa mga nuog nga wa mabantayi ang hinungdan niini tungod kay way kuryente ang maong barko ug way nagtrabaho nianang adlawa. Wa pa usab makahatag ang kabomberohan sa danyos niini.  (BANAT NEWS)