CEBU, Philippines - Alerto karon ang kapolisan sa Bohol sa posibleng bawos nga himuon sa grupo sa napatay nga gipasanginlang drug lord nga si Owen Rosales ngadto sa mga sakop sa kapolisan.
Si Sr. Supt. Orlando Ualat, ang officer-in charge sa Police Regional Office-7 mihatag sa maong pasidaan human sa nahitabong engkwentro niadtong Domingo sa buntag diha sa usa ka beach resort sa Bien Unido, Bohol.
Gawas kang Rosales, napatay usab ang lima niya ka mga sakop ug nakuha gikan sa grupo ang usa ka M16 Armalite Rifle, duha ka KG-9, upat ka kalibre 45 pistola, usa ka 9mm pistol, duha ka .38 kalibre ug usa ka granada.
Si Ualat miingon nga nagtuo nga may kalambigitan ang grupo ni Rosales sa kamatayon nila ni Chief Inspector George Caña , hepe sa Ubay, Bohol nga gi-ambush niadtong Sabado sa gabii sa Talibon, ug pagpatay kang SPO1 Noel Romagos, ang officer-in charge sa Danao Police Station sa Bohol niadtong Abril 29 ning tuiga.
Matud pa ni Ualat, ang grupo ni Rosales naglihok sa maong mga lungsod.
Ang hepe sa Bohol Provincial Intelligence Branch nga si Chief Inspector Alvin Futalan nga nahinabi sa Banat News miingon nga wala na sila mokompiyansa karon. Gisubay na usab nila karon ang impormasyong giingong dunay mga polis ug mga politiko nga nagdawatan og drug money gikan sa mga drug lords.
Sa laing bahin, si Commission on Human Rights (CHR-7)Primo Cadampog Chief Investigator mohimo og imbestigasyon labot sa hitabo aron sutaon kun nasubay ba sa rules of engagement ang mga pulis. (BANAT NEWS)