Hangyong i-dismiss ang kaso sa ‘cult leader’ gibasura

CEBU, Philippines - Hangyo sa gipasanginlang lider sa usa ka kulto sa lungsod sa Balamban pagbasura sa kasong serious illegal detention gi-dismiss ni Regional Trial Court Branch 59 Judge Hermes Montero.

Mihangyo si Casiano Apduhan ngadto sa korte sa pag-dismiss sa kaso nga gipasaka batok kaniya mahitungod sa giingong ilegal nga pagkuha ug pagpapuyo ni Emma Nepomuceno sa iyang balay.

Si Casiano giila nga lider sa usa ka grupo sa kulto sa Barangay Buanoy Lungsod sa Balamban, alegasyon kini nga iyang gihimakak.

Gipasanginlan usab siya sa pagpatay sa batang lalaki kansang lawas napalgang gilubong ilawom sa ilang balay.

Si Nepomuceno giluwas sa National Bureau Investigation sulod sa balay ni Apduhan niadtong Marso ning tuiga apan matud ni Emma nga wala siya pugsa ug wala siya prisoha sa balay sa sinumbong.

Apan si Eleuterio Repuela usa ka residente sa Alpaco sa dakbayan Naga ug amahan sa batang gipatay mi-testigo nga pinugngan ang mga lihok ni Emma kay naa ra kini kanunay sa sulod sa balay nga gialihan og iron grills ug padlocks.

Tungod niini usa ka psychologist ang mihiling sa pangisip ni Nepomuceno ug matud ni Maryjun Delgado dunay Stockholm Syndrome ang maong babaye, usa ka mental disorder nga mas mosimpatiya sila sa mga tawong mipasipala kanila. (/EIM)(BANAT NEWS)