CEBU, Philippines - Tungod sa kahadlok nga adunay nangita kaniya aron siya patyon, ang kauban ni “Pachoy†nga si Reynante Baylosis alyas Tambok mitahan na ngadto sa City Intelligence Branch (CIB). Si Manuel Richard Corominas nga naila nga Pachoy mao kadto’ng lider sa mga carnappers nga naghimo og “joy riding†gamit ang ilang kinawat nga sakyanan apan gipusil nila ang duha ka tawo nga ilang giilogan sa sakyanan.
Si Pachoy miangkon usab nga maoy mipusil ug mipatay sa pag-umangkon ni Vice Mayor Edgardo Labella tungod sa panagbikil nila bahin sa isyu sa ilegal nga drugas.
Matud ni CIB Chief Romeo Santander nga ang inahan ni Baylosis nga si Isidra maoy una’ng miduol kanila ug mipahibalo nga mo-surrender ang iyang anak. Tuod, si Baylosis mitahan kaniadto’ng Sabado.
Nasayran nga si Baylosis didto diay mitago sa dakbayan sa Ormoc human siya misibat dinhi sa Sugbo diha nga gisigihan na siya og pangita sa kapolisan.
Sumala pa ni Santander nga nagpasalamat siya sa gibuhat sa inahan ni Baylosis nga maoy nangunay pagdala sa iyang anak aron motahan sa kapolisan.
Giisip sa kapolisan nga nahuman na ang imbestigasyon sa kaso pagpusil ni Eleanor Rivera kay anaa na sa mga kamot sa kapolisan sila si Pachoy, Tambok ug kadto’ng menor de-edad nila nga kauban.
Gisubay sa kapolisan kun duna pa ba’y ubang kaso nga gikalambigitan si Tambok, aron ‘sab kini madugang sa pagpasaka batok kaniya adto sa hukmanan.
Ang menor de-edad nila nga kauban maoy mitug-an og mga kasayuran bahin sa ilang grupo ug nahimo’ng yawe sa dali nga pagkasikop nila ni Pachoy ug pagtahan ni Tambok. (BANAT NEWS)