Kapin 200 ka batang ‘Bungi’ gioperahan

CEBU, Philippines - Sobra sa 200 ka mga batang dunay pikas sa ngabil ug lingag-ngagan ang makapahimulos sa libreng reconstructive surgery sa Operation Smile Medical Mission Cebu nga ipahigayon sulod sa upat ka adlaw sugod karong adlawa diha sa Adventist Hospital o kanhi Miller Hospital.

Ang chairperson sa MSY Charitable Foundation Inc. nga si Mariquita Salimbangon-Yeung nagkanayon nga padayonon nila  ang maong misyon ug mapasalamaton siya sa mga volunteer nga doktor.    Si Dr. Ricardo Barros, pediatrician gikan sa Brazil nagkanayon nga base sa scientific nga pagtuon nga ang batang makabaton og mga samang deperensiya sa panglawas kuwang kini sa folic acid ug mga bitamina ug mineral samtang naa pa kini sa sabakan sa inahan.

Gibana-banang sa 500 ka batang Filipino nga ipanganak matag tuig nga dunay pikas ang ngabil o bungi. Base sa datus nga nahipos sa Operation Smile, napulo porsiyento sa bungi o 40 ka mga bata ang mamatay nga dili pa makaabot sa usa ka tuig ang panuigon ug 12 porsiyento o 480 ang dili mabuhi lapas sa panuigon nga 5-anyos.

Si Ramona Aliño, executive director sa misyon nagkanayon nga 150 ka bata ang ilang target nga operahan apan sukad kagahapon mikabat na sa 225 ka bata ang nagpalista.

Gibutyag ni Aliño nga ang labing bata nga gikatakda nilang operahan nagpanuigon kini og walo ka buwan. Ang surgery molanat kini sa 45 minutos.    (BANAT NEWS)