CEBU, Philippines - Andam tabangan sa Commission on Human Rights -7 ang ginikanan sa ikalima nga bata nga giingong giplasteran usab ang baba sud sa Maternity Hospital.
Matud ni Lilybeth Llona, imbestigador sa CHR-7 nga wala pa nila mahinabi ang ginikanan sa bata tungod igo lang gi-send kanila ang pictures sa bata pinaagi sa social networking site nga Facebook.
Giawhag hinoon sa CHR-7 ang ginikanan nga mopatim-aw aron makapagawas og pamahayag nga magpamatuod nga tinuod ang nakita sa pictures nga dunay plaster ang baba sa bata.
Nagtuo hinoon ang CHR-7 nga ang pagpatim-aw niining mga ginikanan karon nagpasabot nga gusto lang nila korihian ang pangangkon sa maong tambalanan nga wala nila gihimo ang pagplaster sa baba sa mga bata.
Ang Department of Health -7 sa ilang bahin mibutyag nga ang ilang papel mao ra gyud ang pagsusi kun ang polisiya sa tambalanan nagsubay ba sa DOH standard.
Subli usab silang nanawagan niadtong mga ginikanan nga adunay susamang kasinatian nga dili magpanuko sa pagpangutana sa doktor nga maoy nagbantay sa ilang anak aron mahibaw-an kun unsay tinud-anay nga nahitabo. (/EIM)(BANAT NEWS)