CEBU, Philippines - Human sa siyam ka oras ang negosasyon, nadakpan sa kapolisan ang usa ka sakop sa pamilyang Durano sa dakbayan sa Danao tungod sa paghupot og armas ug nadiskubrehan usab nga dunay mga illegal drugs sa iyang sakyanan.
Ang dinakpan naila nga si Eduardito Durano, 49, nagpuyo sa Tabok, Kamalig, Danao City kinsa gialarma kagahapon sa kaadlawon diha sa Ilaya, Poblacion, Danao City. Ang grupo ni Senior Inspector Cesar Omisola, hepe sa intelligence section sa Danao City Police Station daling miresponde apan nakabiya na ang maong lalaki mao nga ang kauban na lang nila maoy mi-blocking sa sakyanan niini diha sa sitio Tabok , Kamalig.
Apan matud pa nga inay mohunong, gidasmagan hinuon sila niini sa iyang multicab ug pagkahuman midagan sa sulod sa iyang balay ug dunay armas nga kalibre 45 nga pistola nga natagak duol sa gate niini.
Gihangyo kini sa mga polis nga pagawson apan gikatahong mihulga hinuon kining iyang pasakitan ang iyang mga anak ug midemanda nga paanhaon kaniya si kanhi mayor Don Durano, apan ang miabot mao ang kasamtangang Mayor Ramonito Durano. Matud pa nga gihangyo siya sa mga polis nga dili arestohon ug dalhon kini sa hospital human giingong naglisod kini ug ginhawa, ug dihang migawas na kini gihamagan kini dayon og gisikop sa mga polis. Sa pagsusi sa kapulisan sa sakyanan ni Durano, nakuha ang tulo ka gagmay ug usa ka daku nga putos sa gituohang shabu ug ingon man usa ka granada.
Apan sa imbestigasyon sa kapulisan, gilimod sa mga anak niini nga sila gi-hostage niini, matud pa nila dunay sakit sa kasingkasing ang ilang amahan. (/EIM)(BANAT NEWS)