CEBU, Philippines - Kritikal ang kahimtang sa usa ka 33 anyos nga lalaki human pusila samtang naglingkod atbang sa usa ka subdivision sa Barangay Nangka, Consolacion niadtong Martes sa gabii.
Kapolisan nagtoo nga utang sa ginadiling drugas ang hinungdan sa pagpusil ni Renante Zamora, taga Barangay Luz, dakbayan sa Sugbo.
Usa ka motorsiklo nga may sakay duha ka lalaki ang giingong kalit lang mihunong atubangan sa gilingkuran sa biktima ug sa silingan niini nga si Wenjel Aniñon ug dayon pusil sa biktima igo sa nawong nga bahin.
Daling misibat ang duha ka lalaki sakay sa motorsiklo paingon sa wala masayri nga direksyon.
Nakuha sa kapolisan ang cellphone nga gigamit ni Zamora diin nasayran nga may kasabot nga usa ka Danny Limutan nga pahulaton kini sa maong dapit kay ihatud sa usa ka alyas Datu ang iyang gipangayo nga butang.
Matud ni Insp. Wendell Abellana sa Consolacion Police Station, nga posibleng wala na kabayad ang suspek sa gikuha niini nga drugas ug nagduda sila nga giilad lang ang biktima nga paadtoon sa maong lugar aron didto birahan.
Nakuha sa kapulisan sa crime scene ang deformed slug sa wala pa matino nga kalibre sa armas samtang nagpaalim sulod sa tambalanan ang biktima. (BANAT NEWS)