CEBU, Philippines - Gipasalig sa Land Transportation Franchising and Regulatory Board nga walay makulban sa kaldero nga mga drayber ug operator sa mga public utility jeepneys sa higayon nga ipatuman na ang Cebu-Bus Rapid Transit (BRT) system.
Matud ni LTFRB-7 Regional Director Ahmed Cuizon nga kabahin gihapon sa BRT system ang mga PUJs.
Kini gumikan kay hatagan man gihapon og rota ang mga PUJs nga mohakot sa mga pasahero alang sa BRT.
Gihulagway ni Cuizon ang sistema nga sama sa bukog sa isda diin ang BRT mosubay sa dakung bukog samtang dawaton sa mga PUJs ang mga pasahero padulong sa rota subay sa gagmay’ng bukog.
Gihangop sa LTFRB ang pag-aprobar sa National Economic Development Authority (NEDA) sa BRT system sa Sugbo isip epektibo, hamugaway ug paspas.
Matud ni Cuizon nga kung may maapektohan g’yud nga mga PUJs, ang mga drayber o kaha sakop sa ilang pamilya hatagan og prayoridad nga makatrabaho sa BRT system isip tiketera, tindera, tiglimpyo ug uban pang trabaho sa 14 ka estasyonan.
Ang mga PUJs nga dili na makabiyahe hatagan og laing prangkisa isip tighatud og kargamento sa mga hardwares, malls, furniture ug appliances stores.
Dugang ni Cuizon nga kinahanglan nga walay mawagtangan sa panginabuhi sa mga PUJ drayber ug operators sa higayon nga matuman na ang maong proyekto. (BANAT NEWS)