CEBU, Philippines - Gitakda sa Land Transportation Franchising and Regulatory Board (LTFRB)-7 karong Hunyo 24 ang public hearing sa petisyon sa pagpausbaw sa pletehan sa Sugbo ug sa rehiyon 7.
Kini human nimando ang labaw’ng buhatan sa LTFRB kang Regional Director Ahmed Cuizon sa pagpahigayon sa public hearing sa petisyon nga gipasaka sa Cebu Integrated Transport Service Multi-purpose Cooperative (CITRASCO).
Matud ni Cuizon nga ang oras ug lugar diin ipahigayon ang public hearing ipahibalo lang unya.
Atol sa 888 News Forum sa Marco Polo Plaza hotel kagahapon, gidapit ni Cuizon ang tanang sektor sama sa mga tinun-an, mga mamumuo, senior citizens ug uban pa sa pagtambong sa public hearing. Matud ni Cuizon nga ang resulta sa public hearing ang basehan sa iyang rekomendasyon sa ulohang buhatan sa LTFRB nga maoy mohimo sa hingpit nga desisyon.
Ang LTFRB sa niaging semana niaprobar sa 50 sentabos nga usbaw sa minimum nga pletehan sa mga public utility jeepneys (PUJ) sa National Capital Region, Rehiyon 3 ug 4 sugod karong Hunyo 14.
Niadtong Marso, ang CITRASCO niduso og petisyon alang sa P2.50 nga usbaw sa kasamtangang minimum nga pletehan sa mga PUJ nga P7.50.
Hinoon sulod sa duha ka tuig ang nakalabay, ang mga drayber nangolekta og P8 nga minimum nga pletehan sa rason nga wala’y ikasukli nga 50 sentabos.
Ang P6 nga minimum nga pletehan sa mga tinun-an ug senior citizens wala usab tumana sa mga drayber ug konduktor sanglit P7 man ang ilang gikolekta. (BANAT NEWS)