Ubang classrooms sa Mandaue di pa magamit
CEBU, Philippines - Wala pa’y clearance sa City Engineer’s Office sa Mandaue ang ubang classrooms nga giayo human naguba sa linog hinungdan nga wala pa usab kini nagamit sa pagbukas sa klase.
Matud ni Benjamin Tiongson, administrative officer sa Department of Education (DepEd)-Mandaue City Division, nga ang clearance ang ilang basehan nga luwas na nga i-okupar ang classrooms sa mga tinun-an.
Hinoon sumala ni Tiongson nga daghan na sa naguba sa 7.2 magnitude nga linog ug bagyong Yolanda nga mga lawak saringan ang nahuman na sa pag-ayo nga gigastohan sa kagamhanan sa dakbayan sa Mandaue.
Gibutyag ni Tiongson nga adunay wala pa nahuman pag-ayo ug ang pipila wala pa usab masugdi sa pag-ayo.
Matud niya nga ang mga nahuman na pag-ayo daku kaayo og ikatabang sa pagsulbad sa nasinati nga kakulang sa mga lawak saringan sa mga publikong tunghaan sa dakbayan.
Napanglantawan na ang pagsaka sa gidaghanon sa mga tinun-an nga motungha sa high school ug elementarya sa mga publikong tulunghaan sa dakbayan karong tuiga.
Kini nunot sa gipatuman nga usbaw sa matrikula sa mga pribadong tunghaan ug ang hugot nga kampanya sa DepEd sa pagpabalik og tungha sa mga batan-on nga wala makatungha sa miaging tuig. Nakadugang usab sa gidaghanon ang mga tinun-an nga migradwar sa Alternative Learning System (ALS) nga motungha na usab sa unang ang-ang sa sekondarya karong tuiga. (BANAT NEWS)
- Latest
