CEBU, Philippines - Gisikop sa kapolisan sa lungsod sa Asturias ang lalaki nga mibabag sa pagdakop sa usa ka drug pusher atol sa buy-bust operation sa barangay Looc Norte alas 9 pasado niadtong Sabado. Ang nasikop mao si Jimuel Intenado, 23, molupyo sa nahisgutang lugar.
Si PO1 Joe Fry Tapao nga nahinabi sa Banat News miingon nga si Cyrus Rallos unta ang ilang tumong sa buy-bust operation apan nakasibat.
Matud pa ni Tapao nga human siya ug usa ka polis nakapalit sa usa ka paketeng shabu, nakabantay si Rallos nga siya dakpon ug daling midagan sa kalapukan.
Migukod unta si Tapao apan gibabagan ni Intenado hinungdan nga maoy gidakop. Nakuhaan og usa ka paketeng shabu si Intenado dihang girekisa sa kapolisan.
Mag-atubang og kasong kalapasan sa Comprehensive Dangerous Drugs Act of 2002 ug obstruction of justice si Intenado samtang si Rallos pasakaan gihapon og kaso kalapasan sa balaud sa illegal nga drugas bisan kini nakasibat. (BANAT NEWS)