CEBU, Philippines - Gipahimangnoan sa Department of Education ang mga tunghaan nga sustansiyadong pagkaon ang ibaligya sa mga canteen niining pagbukas na sa klase.
Si Grace Espos, DepEd- 7 nutritionist-dietitian, miingon nga ang dili pagsanong sa pahimangno hayan moresulta sa dili maayong kahimtang sa panglawas sa kabataan nga nagtungha. Dugang sa iyang pahimangno mao nga angay gyud likayan ang pagbaligya sa mga canteen og mga softdrinks ug maoy ihulip ang juice gikan sa prutas o buko juice ug dili artificial powder.
Giawhag usab ang mga ginikanan sa pagpadala og balon alang sa snacks sa ilang mga anak sama sa kamote, pichi-pichi, palitaw, puto cheese, gimantikaang saging ug cassava cake. Gidili usab sa mga canteen ang mga junk foods. Gidasig usab ang mga magtutudlo sa pagtanum og kamunggay ug ubang utanon nga magamit alang sa pagahimoong supplementary feeding. (BANAT NEWS)