CEBU, Philippines - Ang naandan nga pwesto sa Pier 3 nga dunggoanan sa mga ferry boat nga mobiyahe padulong sa dakbayan sa Lapu-Lapu ug balik diha sa pantalan gisirad-an tungod kay gipalawman kini sa Cebu Port Authority. Gikan sa Pier 3, gibalhin sa CPA ang dunggoanan sa mga ferry boat ngadto sa Berth 21 nga dili usab hinuon kaayo layo gikan sa naandan nga pwesto.
Apan daghan g’yud nga mga pasahero ang nagbagulbol kay nabag-ohan sila sa gipatuman nga temporaryo’ng kausaban sa kadagkoan sa CPA.
Gawas sa taas kaayo ang linya sa pagpalit og ticket ug pagpaabot kapin usa ka oras usa sila makasakay sa ferry boat, giingon nga hasol na kaayo kay molabang pa sila sa pikas eskena.
Si Itchelle Sarias, suki nga pasahero sa ferry boat, nagkanayon nga taas kaayo ang proseso ug mag-antos usa ang pasahero sa dili pa makasakay.
Samtang gibalhin ang dunggoanan sa ferry boat apan nagpabilin sa karaang lugar ang “ticketing area†sa maong terminal. Ilang gihulagway nga dako’ng suliran ang pagsige og labang sa bag-ong pantalan ilabi na kun gabii kay daghan nang sakyanan ang manulod sa Pier 3.
Giasoy ni Sarias nga risgo alang kanila nga mga pasahero ang mga sakyanan nga manulod sa pantalan kay tungod sa kahuot sa lugar kuwang na lang maligsan sila sa mga motorista.
Gisugyot usab ni Sarias nga angay unta nga adunay “strict monitoring†aron sa pagsiguro nga wala’y pasahero nga makasal-ot sa linya sa pagsakay og ferryboat. Naobserbahan nga sa panahon nga buksan na ang gate ngadto sa ticketing area, maglumbaanay ang mga pasahero og labang sa pikas eskena aron sa pagsakay.
Kini nga senaryo maoy masinati sa mga pasahero mata’g adlaw busa giawhag nila ang kadagkoan sa CPA nga mahatagan unta kini og diha-diha nga sulbad. Ang sub-port manager sa Pier 3 nga si Engr. Lilius Udtohan nagkanayon nga mahinungdanon nga ipahigayon ang dredging sa pantalan kay mabaw na kaayo kini tungod sa kanunay’ng pagbaha.
Gikatakdang mahuman ang pagpalawom sa pantalan sulod sa unom ka buwan. Gibutyag ni Udtohan nga himuon na nga permanente ang dunggoanan sa ferry boat adto sa Berth 21. Kini tungod kay himuon na nila nga Roro Ramp ang karaang lugar sa Pier 3. Hinuon dili angay mabalaka ang mga pasahero kay magbuhat sila og bag-ong opisina nga lukatanan og tiket duol sa bag-ong pantalan sa ferryboat. Tungod kay huot na kaayo ang pantalan sa Sugbo, matud ni Udtohan nga mas labing haom ang pagtukod og International Port didto sa Tayud, Consolacion. (BANAT NEWS)