BRT mas nindot sakyan kay sa PUJ
CEBU, Philippines - Ang kadagkoan sa City Traffic Operations Management miingon nga mas paspas sakyan ang Bus Rapid Transit (BRT) kay sa mga passenger jeepney sanglit aduna sila’y kaugalingon nga agianan.
Kun wala’y kakulian, ang BRT makompleto na nga mo-operate dinhi sa dakbayan sa Sugbo sa tuig 2017. Ang pletehan sa bus mahal lang og gamay kay sa PUJ apan airconditioned.
Sanglit ang BRT aduna may iya’ng kaugalingon nga agianan nga dili mahimo’ng agian sa uban nga mga sakyanan, malantawan na daan nga mas paspas ang dagan sa BRT kay sa PUJ.
Ang National Economic Development Authority (NEDA) miaprobar na nga idayon g'yud pagpatuman ang P10 bilyones nga BRT Project dinhi sa dakbayan sa Sugbo.
Si Rafael Christopher Yap, ang Executive Officer sa CITOM, miingon nga karong giaprobahan na sa NEDA ang BRT project, makasugod na ang kagamhanan sa paghimo og detailed engineering designs.
Ang rota sa BRT manukad sa Barangay Talamban subay sa Governor Mariano Cuenco Avenue lahos sa Archbishop Reyes Avenue, liko sa dalan Escario paingon sa Kapitolyo.
Gikan sa Kapitolyo, ang rota sa BRT mosubay sa Osmeña Boulevard ug dayon moliko sa P. del Rosario paingon na sa Natalio Bacalso Avenue lahos na sa Barangay Bulacao.
Gibutyag usab ni Yap nga sutaon sa CITOM kun unsaon pagtabang kadtong mga drayber og PUJ nga maapektahan sa pagpadagan na unya sa BRT.
Matud ni Yap nga dili g’yud hingpit nga wagtangon ang PUJ sa mga rota nga anha moagi ang BRT, apan magsilbi na lang sila nga secondary transport vehicles.
Ang BRT Project gisugyot kaniadto ni kanhi mayor Tomas Osmeña kay natan-aw man niya nga epektibo ang mao nga matang sa sakyanan diha’ng miadto sila sa Coritiba, Brazil kaniadto.
Kadto’ng apektado nga draybers makahimo pag-apply isip drayber sa bus, mekaniko ug uban nga mga kawani sa mga bus operators nga mopadagan sa BRT project.
Gihangop ni Yap ang pag-uyon na sa NEDA sa BRT project kay nagkahulogan kini nga mapalambo na usab nila unya ang traffic signal system sa dakbayan. (BANAT NEWS)
- Latest
