CEBU, Philippines - Tungod sa pag-aprubar sa Land Transportation Franchising and Regulatory Board (LTFRB) sa gipangayong umento sa pletehan sa transport groups didto sa kaulohan, gipanglantawan nga posibleng mahitabo usab kini sa Central Visayas.
Suma pa ni LTFRB-7 regional director Ahmed Cuizon sa usa ka interbyu sa sibyaanan nga posibleng may kahigayonan nga tugotan sa ilang buhatan ang gipangayo nga usbaw sa pletehan sa Cebu Integrated Transport Cooperative (CITRASCO) kinsa nangayo og P2.50 nga fare increase.
Kung maaprubahan kini hayan mahimo nang P10 ang minimum nga pletehan sa unang lima ka kilometro.
Apan si Cuizon miingon nga ang pagtugot nga usbaw sa pletehan dinhi sa Sugbo mag-agad sa resulta sa ipahigayon nga public hearing aron paminawon ang posisyon sa mga nagkadaiyang sektor nga pabor ug supak sa petisyon sa CITRASCO.
Hinuon iyang gitataw nga hangtud karon ang iyang buhatan nagpadayon sa pagtuon kun kanus-a ipahigayon ang naasoy nga public hearing.(/EIM)(BANAT NEWS)