CEBU, Philippines - Gipasakaan na og kasong murder ug robbery ang duha ka suspetsadong mipusil patay sa usa ka Indian national niadtong Lunes nga nahitabo sa milabay’ng semana diha sa sitio Crusher, Barangay Lawaan III sa dakbayan sa Talisay. Ang biktima nga si Rajit Singh, nangolekta unta sa mga nangutang kaniya dihang giduol kini sa mga suspetsado nga sila si Jonalo Cabrera alyas “Joan†ug Arjan Ababon ug diretsong gipusil.
Sa una nagtuo ang kapolisan nga dunay nasuko sa biktima nga nalambigit sa negosyo apan niining ulahi lang nahibaw-an nga giingong tulis diay ang motibo sa maong hitabo kay sumala pang SPO1 Mikie Espina may mga saksi nga giingong gikuha sa duha ang clutch bag nga gisudlan sa biktima og kwarta ug cellphone niini. Gikompirmar kini sa asawa sa namatay nga si Cherry Ann Singh. (BANAT NEWS)