CEBU, Philippines - Nasikop sa usa ka kanhi polis ang usa ka lalaki nga gipasanginlang nangawat og metrohan sa kuryente kagahapon sa hapon sa dalan V. Gullas ug A. Mabini sa dakbayan sa Sugbo. Ang nangawat nagpaila nga si Danny Liberato, 45, taga Tabuelan.
Samtang ang midakop kaniya mao ang kanhi polis nga si Rodrigo Mangubat nga nagpuyo ra sab sa maong lugar.
Sumala pa ni Mangubat nga naa siya sa iyang tindahan ug nahibulong siya nga napawong ang kuryente sa iyang tindahan ug iyang nakit-an si Liberato sa unahan nga gitangtang diay ang metrohan sa iyang kuryente maong iya kining giadto ug gidakop.
Apan si Liberato nga nahinabi sa Banat News hugot nga mihimakak sa maong pasangil ug miingon nga iya lang kining gitangtang kay nagsiga-siga man kini sanglit kanhi contractor man siya sa VECO.
Sumala ni Liberato nga iya untang ihatod sa Patria ang metro tungod kay naa man ngadto ang buhatan sa VECO ug wa siya’y tumong nga kawaton kini. Si Liberato gidala sa Waterfront Police Station aron matun-an kung pasakaan ba gyud kini og kaso. (BANAT NEWS)