DENR supak sa gipangayong TRO sa Argao

CEBU, Philippines - Gisupak sa Department of Environment and Natural Resources-7 ang gipangayong temporary restraining order (TRO) ug injunction sa mga opisyal sa lungsod sa Argao labot sa ilegal nga pagputol og kahoy sa forest protected area.

Sila si DENR Sec. Ramon Paje, DENR-7 Regional Executive Director Isabelo Montejo ug ubang mga opisyal sa ahensiya nitumbok nga ang korte walay gahum pag-isyu og TRO aron pugngan ang ahensiya sa gobiyerno sa pagpatuman sa balaud sa kalikupan.

Si Paje, Montejo ug kaubanan nagkanayon nga ubos sa balaud, bugtong ang Korte Suprema lang ang makaisyu og TRO ug writ of preliminary injunction batok sa "lawful action of government agencies."

Subay niini, si Paje, Montejo ug kaubanan niawhag sa korte nga ibasura ang petisyon ni Argao Mayor Edsel Galeos ug ubang opisyal sa Argao nga nangayo og TRO ug injunction.

Kini tungod kay ang pagputol og kahoy sa timberland ug sulod sa National Greening Program sa DENR alang sa himoong karsada sa Argao dakong kalapasan sa moratorium sa pagputol sa kahoy ilabina sa timberland area o protected areas. (BANAT NEWS)