CEBU, Philippines - Andam mopahuwam ang Kapitolyo og pondo nga ibayad sa bayranan sa kuryente sa mga buhatan sa gobiyerno sa dakbayan sa Toledo.
Kini ang gipadayag ni Gob. Hilario Davide III human napakgang ang operasyon sa kagamhanan sa dakbayan nunot sa pagkaputol sa linya sa kuryente gumikan sa utang nga P1.5 milyones ngadto sa Cebu Electric Cooperative III. Si Bise Gob. Agnes Magpale miluwat usab sa maong sugyot nga pagpahuwam og pondo sa dakbayan sa Toledo aron mahibalik sa normal ang operasyon sa mga buhatan sa gobiyerno.
Nagtoo si Davide nga gusto lang hatagan ni Mayor Sonny Osmeña og leksiyon ang mga nibabag sa P619 milyones nga gahin alang ning tuiga. Gisaway ni Davide ang pagluwat sa korte og kamandoan nga dili ipagasto ang pondo samtang gibabagan kini sa mayoriya sa mga sakop sa konseho sa siyudad.
"'Di gyud angay moapil-apil ang korte ani, this is a discussion sa budget," matud ni Davide.
Samtang tinguha ni Osmeña nga gamiton ang iyang mga trak gikan sa Negros Occidental nga gamiton sa pagkolekta sa basura.
Matud ni Osmeña nga iyang kaugalingong kwarta ang ipalit sa krudo sa trak.
Gipahibawo ni Osmeña nga andam usab motabang ang mga negosyante sa siyudad sa pagpabalik sa kuryente pinaagi sa pagbayad sa utang sa Cebeco. (BANAT NEWS)