CEBU, Philippines - Ang mga gun owners dinhi sa Central Visayas ang pwede na nga mokuha sa ilang lisensya sa ilang armas diha sa Police Regional Office- 7 human nagpagawas og restraining order ang Korte Suprema sa centralization sa pagpalisensya sa ilang mga armas nga gipagawas niadtong nakalabay nga bulan.
Si Sr. Supt. Erson Digal, hepe sa Regional Operations and Planning Division sa PRO 7 mibutyag nga dunay usa ka memorandum nga gikan sa Civil Security Group sa Firearms and Explosives Office may kalabotan sa pagbuhi og balik sa pag-access sa katawhan nga mopalisensya sa ilang armas dinhi na sa probinsiya. Kahinumduman nga si PNP chief Director General Alan Purisima miisyu og usa ka kamanduan nga nagpahunong sa regional offices pagproseso ug pag-isyu sa lisensiya sa mga armas kay adto lang kini himuon sa Camp Crame sa kaulohan.
Si Aberdovey Belleza, ang Talisay Aqua City Gun Club president kini misaway sa kamandoan ni Purisima kay dako kaayo kini og kahasol ug gastos sa mga gun owners. Nanawagan si Belleza nga pahugtan sa kapulisan ang kampanya batok sa mga walay lisensya nga armas nga sagad gamiton sa mga krimen. (BANAT NEWS)