CEBU, Philippines - Bisan og hingpit nang gitak-opan sa inter-agency task group ang ilang imbestigasyon sa bata nga giplasteran ang baba sud sa nursery sa Cebu Puericulture and Maternity House , ang Commission on Human Rights (CHR-7) mohimo pa gihapon og linain nga imbestigasyon.
Giawhag ni Atty. Dante Jadman imbestigador sa CHR-7 ang mga ginikanan nga duna say kasinatian nga gibutangan og plaster ang baba sa mga bag-ong natawo nga bata sa pag-report sa ilang buhatan.
Matud ni Jadman nga mahimo silang mopahigayon og motu propio investigation o awtomatiko nga imbestigasyon kalabot sa maong mga insidente.
Apan bisan og may makita silang kalapasan di sila mahimong makapahamtang og silot sa tambalanan kay rekomendasyon ray ilang mahimo nga mahimong pasakaan og kasong kriminal o administratiba ang gireklamo.
Samtang paabuton una sa Department of Health (DOH-7) ang final report sa maternity hospital una iduso sa ilang uluhang buhatan nga maoy mohukom kun angayan o dili i-renew ang lisensiya sa maong tambalanan.
Mahitungod sa ethical issues ilaha kining giduso ngadto sa Philippine Medical Association ug sa Professional Regulations Commission tungod kay wala man silay hurisdiksyon niini. (BANAT NEWS)