Wala gihapon molihok ang LTO

CEBU, Philippines - Ang LTO-7 operations branch hangtod karon wala pa gayud makabalik paghimo’g kampanya pagpanakop sa mga abusado ug masalaypon nga mga drayber.

Ang rason niini mao nga nagkuwang sila og mga kawani nga regular nga anha idistino sa law enforcement section aron manakop sa mga drayber. Nahibaw-an nga si LTO Chief Alfonso Tan Jr. mihatag og kamandoan nga walay mga kaswal nga kawani sa LTO, sama sa “job order employees” nga idistino sa law enforcement.

Kini maoy hinungdan nga naghudyaka ang mga abusado nga drayber nga wala na’y nanakop kanila tungod kay ang mga traffic enforcers dili man kaayo manakop og mga badlongon nga drayber.

Usa ka tinubdan sa Banat Manobela diha sa LTO-7 Regional Office nagkanayon nga ang mga kanhi sakop sa operations branch nga mga “job order employees” gipangtangtang sa serbisyo.

Matud pa nga si DOTC Assistant Secretary Tan nga maoy gitugyanan pagdumala sa LTO mipasabot nga dili maayo nga idistino ang mga job order workers sa enforcement kay dili sila magukod kun maghimo og mga binuang.

Mga traffic enforcers miingon nga dili sila makadakop sa mga drayber nga nakahimo og kalapasan sa Transportation and Traffic Code kay wala man sila isyuhi og Temporary Operators Permit (TOP).

Ang lisensya sa mga drayber mahimo lang sakmiton sa mga road law enforcers kun isyuhan sila og TOP. Sagad sa mga traffic enforcers giisyuhan lang og mga Traffic Citation Ticket nga walay gahum aron ang lisensya sa mga drayber maimbargo. (BANAT NEWS)

Show comments