Sari-sari store gidaginot Duha nangalumos

CEBU, Philippines - Duha ka mga tawo ang namatay human mangalumos sa managlahing lugar dinhi sa Sugbo, usa kanila taga Barangay Suba-Basbas dakbayan sa Lapu-Lapu sa milabay’ng hapon.

Ang biktima mao si Fausto Lastimada Ngujo, 43, residente sa maong dapit. Sa pasiunang imbestigasyon ni PO1 Jade Querubin ngadto sa igsuon ni Ngujo nga si Maria sayo sa mga alas 2:00 sa milabay’ng hapon nananghid kini nga manginhas apan wa na kini mabalik.

Gipahibalo na lang sila nga nalumos na kini.  Nagtuo si Maria nga posibleng giatake kini sa iyang sakit nga patol hinungdan sa iyang pagkalumos.

Samtang, patay na usab dihang nakit-an ang usa ka wa nailhing lalaki nga naglutaw lutaw sa kadagatan sa Lungsod sa Dumanjug kagahapon sa buntag nga naagian sa usa ka cargo vessel.

Matud pa ni PO3 Dionesio Tagopa ang imbestigador sa Dumanjug Police Station nga nahinabi sa Banat News, nga ang kapitan sa barko nga si Dominggo Sumampong mitawag og laing barko ug kapitan niini nga si Capt. Pilario Balansag ug mao nay midala sa patay nga lawas paingon sa baybayon.

Sumala pa ni Tagopa nga wala sila’y nakuha nga bisan usa ka ID sa patay nga lawas, diin kini nas suot og sleeveless kolor puti, naka shorts og kolor itom nga dunay nakasulat nga “brave boys” gibanabana nga anaa sa 30 hangtod 40-anyos ang panuigon og 5’6 ang gitas-on.

Duna sa’y nakita nga mga samad ug bun-og sa patay nga lawas ang kapulisan, apan dili pa sila makatug-an kung foul play ba kini. (/EIM)(BANAT NEWS)