‘Pusher’ gipadakop sa ginikanan

CEBU, Philippines - Usa ka lalaki ang giunay pagpadakop sa iyang mga ginikanan ngadto sa mga sakop sa City Anti-Illegal Drug Special Operation Task Force (CAIDSOTF) diha sa iyang balay sa Barangay Guadalupe ning dakbayan sa Sugbo.

Ang gipadakop sa ginikanan ug sa iyang mga silingan mao si Radel Chan, 44, kinsa matud pang Senior Inspector Eunil Avergonzado nangunay pagduol kanila aron kini dakpon.

“Daghan na kaayong mga ginikanan sige og reklamo ani niya,” matud pa ni Avergonzado.

Atol sa gilusad nga operasyon sa CAIDSOTF Sabado sa hapon usa ka decoy sa kapulisan ang mipalit kaniya ug dihang gitunol niini ang drugas gisikop dayon si Chan.

Nakuha sa kapulisan usa ka daku nga putos sa shabu nga dunay street value nga 20 mil ka pesos, duha ka tag one hundred peso bill nga marked money ug P1,000.00 nga gituhoan nga halin sa ilegal nga negosyo ni Chan.

Gidugang pa ni Avergonzado nga human sa pagkasikop sa suspetsado, mitawag pa ang ginikanan niini sa ilang buhatan, kay nagpasalamat sa ilang gibuhat ug miesplikar nga gihimo nila kini alang sa kaayohan sa ilang anak ug sa ilang mga apo.

Si Chan nag-atubang karon og kalapasan sa RA 9165 or Comprehensive Drugs Act of 2002, ug walay piyansa nga gigahin alang sa iyang temporaryo nga kagawasan. (/EIM)(BANAT NEWS)