CEBU, Philippines - Nahimo gihapon nga suliran sa mga tricycle operator sa dakbayan sa Lapu-Lapu ang gipatuman nga pamaagi nga dili maapil sa pagbaligya sa ilang tricycles ang prangkisa nga gihatag sa mga opisyal sa siyudad.
Nagpasabot nga kun ibaligya sa mga operators ang ilang tricycles, ang makapalit masakripisyo gihapon sa pag-apply og prangkisa aron sila katugotan nga makapamasahero.
Tungod niini nga paagi wala’y ganahan nga mopalit sa mga tricycles nga gusto na unta nga ibaligya sa ila’ng mga tag-iya.
Si Joebert “Bong†Nemenzo, tsirman sa National Confederation of Tricycle Operator’s and Driver’s Association of the Philippines (NACTODAP), naglaum nga unta usbon sa mga opisyal ang pamaagi.
Matud ni Nemenzo nga nagpadayon gihapon nga gidili sa kagamhanan sa Lapu-Lapu ang pagtakli sa prangkisa ngadto sa makapalit sa tricycle kun ibaligya.
Ang tag-iya sa mga tricycle nga gusto na nga mohunong sa maong matang sa panginabuhi ug ibaligya na ang ilang unit, ang ilang himuon nga iuli nila ang prangkisa ngadto sa City Hall.
Tumong sa kagamhanan paghimo niini’ng paagi aron dili maabusohan ang paghupot og prangkisa kay sayon ra ang pagbalhin ngadto sa laing tawo nga makapalit. Si Nemenzo miingon nga naghunahuna sila karon sa paghimo og bug-at pa nga mga lakang aron makab-ot nila ang kasulbaran sa ilang problema sama sa pagdangop sa korte. (BANAT NEWS)