CEBU, Philippines - Gikatakdang sugod karong Mayo 26, 2014 ang pag-ayo sa PLD Construction sa ilawom sa flyover sa Maguikay, dakbayan sa Mandaue.
Sugod usab sa maong adlaw ang Traffic Enforcement Agency of Mandaue (TEAM) mosirado sa dalan diha ilawom sa flyover gikan sa alas 9:00 sa gabii hangtud na sa alas 5:00 sa buntag.
Si Edwin Ermac, operation chief sa TEAM mibutyag sa Banat News nga gawas sa billboard pagpahibalo sa publiko ug dunay idestino nga traffic enforcers sa flyover.
Matud pa ni Ermac nga walay re-routing nga ipatuman ang ilang buhatan sa higayon nga dili na paagian ang ilawom sa flyover sa Maguikay tungod kay dili man 24-oras ang pagtrabaho niini.
Nunot niini, si Ermac miingon nga ang pribado o mga PUJ nga gikan sa RPN nga moagi sa ilawom sa flyover sa Maguikay adto sila moliko sa tuong bahin ug molahos sa pagsubay sa dalan M.C. Briones hangtud sa dalan eskina sa A.S. Fortuna ug mo-U-turn kini paingon sa pikas habig sa dalan M.C. Briones ug lahos na ngadto sa lungsod sa Consolacion.
Sa nasayran sa Banat News kang Engineer Renult Ricardo nga maoy district engineer sa Department of Public Works and Highways (DPWH)- 7 nga niadto pa untang bulan sa Marso ang pagpaayo sa ilawom sa flyover sa Maguikay apan tungod kay giayo man usab ang dalan ML Quezon ug A.S. Fortuna hinungdan nga giangan-angan ang maong kaugmaran. (BANAT NEWS)