FDA nisusi sa mga school supplies

CEBU, Philippines - Nipahigayun og kinalit nga inspeksiyon ang Food and Drug Administration (FDA) sa mga schools supplies aron pagseguro nga luwas kini sa mga chemical content nga makadaut sa panglawas ilabi na sa mga tinun-an.

Kagahapon sa buntag personal nga namalit og mga schools supplies ang mga tinugyanan sa FDA sa People’s Educational Supply aron ilang ipadala sa ulohang buhatan ug ipaubos sa laboratory test.

Matud ni Rica Aumentado, officer-in-charge sa FDA-7 nga ilang gihimo ang maong lakang tungod sa nagkaduol na nga abli sa klase ug tinguha nila nga walay makalusot nga mga school supplies nga taas ang chemical content.

Tungod sa ka kuwang og tawo sa FDA, random inspection ang ilang gihimo hinoon ilang gipasalig nga himoon nila ang tanan aron makapang-inspeksyon.

Samtang awhag sa FDA sa publiko nga mopalit lang og mga schools supplies nga rehistrado sa ilang buhatan.

Sa miaging tuig gihimo usab nila ang pagsusi sa mga gamit sa eskwelahan hinoon negatibo ang resulta sa lab test gikan sa makadaut nga kemikal.

Kung mapositibo sa lead content ang maong mga school supplies, ang uluhang buhatan sa FDA ang mopahamtang og silot sa nagbaligya niini. (BANAT NEWS)