CEBU, Philippines - Usa ka pulong-pulong ang himuon karong adlawa aron tukion ang problema sa power supply sa Sugbo.
Si Capitol Chief PIO Ethel Natera miingon nga buot masayran ni Gob. Hilario Davide III ang kahimtang sa supply sa kuryente sa lalawigan.
Mikompirmar nga motambong ang Department of Energy (DOE), National Grid Corporation of the Philippines (NGCP), Visayan Electric Company (VECO), Cebu Electric Cooperative (CEBECO) ug Energy Regulatory Commission (ERC).
Dugang usab niya nga ang gobernador nag-andam og pipila ka mga pangutana sama sa unsay tinud-anay nga sitwasyon ug unsay mabuhat sa probinsiya og mga tawo aron dili mograbe ang kakuwang sa kuryente.
Sa pagkakaron dili pa parehas kagrabe ang power shortages sa probinsiya sa Sugbo kun itandi sa Luzon ug Mindanao, tungod kini sa programa sa VECO nga kadtong dagkong kunsumidor paggamiton na sa ilang generator sets aron malikayan ang rotational brownout.
Si Natera misaysay nga posibleng taas-taas pa ang antoson nga power shortage kay ang ting-init molungtod pa hangtod Agosto. (BANAT NEWS)