Gisulod sa maleta nailhan, “karnaper” diay

CEBU, Philippines - Nailhan na ang patay nga lawas nga gisulod sa maleta nga nakit-an sa kasagbutan nga bahin sa Sitio Maomawan, Barangay Babag, siyudad sa Sugbo niadtong nakalabay nga adlaw.

Ang biktima giila nga si Robert Aninipok, 31, nagpuyo sa Sitio Panabang, Barangay Apas, Cebu City nga usa ka drayber sa habal-habal.

Ang  amahan ug inahan sa biktima nga si Macaria ug Rogelio Aninipok dali nga nakig-alayon sa kapulisan human nga ilang nasayran sa mga balita nga aduna’y usa ka patay nga lawas nga napalgan sa kapulisan.

Pinaagi sa ulat sa tiil sa biktima ug ang tungoy-tungoy sa buhok sa likod nga bahin nailhan sa inahan ang iyang anak nga giingon nga nawala kini sulod sa halos usa na ka bulan.

Matud pa ni Macaria nga pipila ka gabii na nga pirme niya nga madamgohan ang iyang anak nga nangayo og tabang kaniya.

“Halos semana na nga magpadamgo siya nako, motawag nako pagtan-aw nako wala man siya,” matud pa sa inahan.

Giangkon hinuon sa inahan nga badlongon ang iyang anak  ug nalambigit kini sa illegal drugs ug sa pagpangarnap og motor dinhi sa dakbayan.

Matud niya iyaha nang gipadakop kaniadto ang biktima tungod sa pagpabadlong ug wala na usab kini tagda pa sa asawa, apan bisan sa kabadlungon sa iyang anak mingawon gyud siya niini matud pa sa naghilak nga si Macaria.

Sumala pa sa inahan nga duna’y duha ka wala mailhi nga tawo ang nagsige og pangita sa iyang anak, apan wala kini magtoo nga mosangpot ba kini sa iyang kamatayon.

Motabang karon ang City Intelligence Branch sa pagsubay kung kinsa man ang mihimo sa maong krimen ug duna na silay gidudahan matud pang Supt. Romeo Santander.

Di kombinsido si Santander nga may koneksyon sa lima ka paketeng shabu sa bulsa niini ang iyang kamatayon.

“Posibleng diversionary tactic pud sa nagpatay nga magbutang og drugas sa bulsa aron drugas nga anggulo ang pasanginlan, pero involved man gud na siya sa carnapping, ato pud na nga subayon,” matud pa ni Supt. Santander.

Sa nasayran nga niadtong adlaw nga Lunes. Mayo 20, napalgan ang lawas niini diha sa Barangay Babag nga giputos og habol, sako, dayon gisulod sa maleta, nga dunay samad dinunggaban sa ubos sa iyang liog. (BANAT NEWS)