Kasabutan tali NHA, LGU gipirmahan
CEBU, Philippines - Gipirmahan na ang kasabutan tali sa National Housing Authority (NHA) ug sa mga lokal nga kagamhanan nga apektado sa bagyong Yolanda labot sa pagtukod sa relocation site sa mga biktima.
Ubos sa kasabutan, ang lungsod ang mangita ug mopalit sa yuta samtang ang NHA ang mogasto sa pagpatukod sa kabalayan.
Pipila ka dapit sa amihanang bahin sa lalawigan sa Sugbo nga nakaandam na sa luna ang lungsod sa San Remigio nga makapahiluna og 700 ka balay, dakbayan sa Bogo nga adunay 2,500 ka balay ug Daanbantayan nga adunay 1,182 ka balay.
Ang mga lungsod sa isla sa Bantayan ug Camotes dili makapahimulos sa maong programa sa NHA sanglit dili titulado ang kayutaan.
Samtang gisugdan na usab ang plano sa lungsod sa Tabuelan human nakapalit og 3.7 ektarya nga yuta nga makapahiluna og 647 ka balay.
Apan giklaro ni Gob. Hilario Davide III nga wala pay natukod ang NHA sanglit makig-alayon pa sila sa mga pribadong donors labot sa panginahanglanon sa proyekto. (BANAT NEWS)
- Latest
