CEBU, Philippines - Gihulagway nga generally peaceful ang gihimo nga Brigada Eskwela sa mga tunghaan sa dakbayan sa Sugbo.
Matud ni Supt. Romeo Santander, hepe sa City Intelligence Branch sa Cebu City Police Office, nga bisan duna’y pipila ka mga panghitabo atol sa Brigada Eskwela, isolated case lang kini.
Si CCPO Director Noli Romana nimando sa mga sakop sa pagpakig-alayon sa mga tunghaan.
Matud ni Santander nga sunod nilang plano karon ang pag-ila sa mga tunghaan nga adunay kasagarang nahitabo nga krimen ilabi na kung mosugod na ang klase.
Apil sa ilang plano ang pagpakig-alayon sa mga opisyal sa kabarangayan kung asa nahimutang ang tunghaan aron magamit ang mga tanod isip ilang dugang pwersa.
Usa sa ilang tutukan ang mga tunghaan nga ngiob ilabi na niadtong may klase sa gabii.
Ipatawag usab sa CIB ang mga security personnel sa mga malls sunod semana aron ilang mahisgutan ang angayang buhaton alang sa seguridad sa ilang mga customers.
Napanglantawan nga mapuno ang mga malls gumikan sa mamalit og mga school supplies nga posibling pahimuslan usab sa mga mangunguot, kawatan ug tulisan.
Duna na’y mga notadong badlongon ang gi-monitor karon sa CIB ug padayon pa nga ila karon nga gisubay kung posibli asa kini mohimo sa ilang operasyon.
Gipahimangnoan ni Santander ang publiko nga magmabinantayon kung mosagol sa duot sa katawhan aron dili mamahimong biktima sa mga badlongon. (BANAT NEWS)