CEBU, Philippines - Patay na nga nadiskubrehan ang duha ka tawo nga gituohan sa kapolisan nga naghikog sa managlahing takna ug dapit sa dakbayan sa Mandaue niadtong miaging adlaw.
Nagpusil sa tampihak sa iyang ulo ang security guard nga si Rodulfo Vistal, 20, nagpuyo sa Sitio Pilapil, Barangay Umapad ug lumad nga taga Barangay Cawaya, lungsod sa Inabanga sa lalawigan sa Bohol.
Si SPO2 Juan Calamba sa kapolisan sa Presinto 5 sa Mandaue City Police Office (MCPO) miingon nga si Vistal patay na dihang nakit-an sa kaubang guwardiya nga si Jesson Pogado diha sa guard house sa pabrika sa noodles sa barangay Umapad nga ilang gibantayan.
Narekober diha sa guard house ang service revolver niini nga kalibre 38.
Samtang gituohang naghikog usab ang delivery boy nga si Roberto Bohol Canoy, 33, taga Tres Rosas sa Barangay Alang-Alang, Dakbayan sa Mandaue.
Ang agalon sa namatay nga si Lowel Bandero maoy nakadiskubre sa patay’ng lawas ni Canoy nga naghigot usab og telephone wire sa iyang liog sa wala pa usab masayri nga hinungdan. (BANAT NEWS)