CEBU, Philippines - Usa ang patay ug duha ang naangol sa managlahing pagpamusil nga nahitabo sa probinsya sa Sugbo niadtong Domingo.
Ang namatay giila nga si Inosincio Asino, 24, ulitawo, taga Sitio Tubog, Upong, Dalaguete, samtang ang naangol sila si Delfin Roble, 14, taga Kahumayan, dakbayan sa Danao ug Franklou Castro, taga Valencia, dakbayan sa Carcar.
Sa lungsod sa Alcoy napalgan ang patay’ng lawas ni Asino nga dunay pinusilan sa ulo.
Si PO2 Erlan Salonoy sa Alcoy Police Station nga nahinabi sa Banat News mibutyag nga duha ka mga mag-uuma nga sila si Romie ug Rocky Glarin ang nakakita sa patay’ng lawas alas 2:45 sa hapon niadtong Domingo sa sitio Canabong, Barangay Pugalo.
Gibanabana nga tulo ngadto sa upat na ka adlaw ang patay’ng lawas nga napalgan gumikan kay padulong na kining madugta.
Sa impormasyon sa pamilya, katapusang nakit-an ang biktima niadtong Mayo 14 ug wala na mahiuli sa ilang panimalay.
Blangko pa ang kapulisan sa hinungdan sa mamumuno.
Sa dakbayan sa Danao, nalandig sa tambalanan si Roble human gipusil gawas sa ilang panimalay alas 10:50 sa gabii niadtong Domingo sa Barangay Kahumayan.
Si Roble nakaangkon og samad pinusilan sa iyang tiil samtang ang nakapusil daling misibat sakay sa motorsiklo.
Sa Carcar, kalit lang usab gipusil si Castro sa iyang paa alas 11:57 sa gabii sa tulo ka tawo samtang nagbarug sa iyang gipuy-an hinungdan sa pagkalandig sa Carcar District Hospital. (/GMR)(BANAT NEWS)