Duha ka aksidenti, unom angol

CEBU, Philippines - Unom ka tawo ang nangaangol sa duha ka managlahing aksidente sa kadalanan sa dakbayan sa Toledo ug lungsod sa Pinamungajan.

Sa Toledo, naangol ang upat ka tawo sa panagbangga sa motorsiklo sa Barangay Magdugo.

Sila si Joseph Pinili, 23, drayber, ug angkas nga sila si Mary Madarcos, 32, Baby Girl Pinili, 14, pulos taga Barangay Magdugo ug Jeffrey Espantallon, taga Barangay Puting Bato ang nakaangkon og pangos ug samad sa kalawasan human magkabangga ang motorsiklo.

Sa imbestigasyon sa Toledo City Trafffic Division nasayran nga si Espantallon ang misungag sa motorsiklo ni Joseph hinungdan sa pagkatumba ug miangol sa mga angkas.

Samtang sa Pinamungajan, naangol si Leonardo Benoya, 53, taga General Climaco, dakbayan sa Toledo human madasmagi sa motorsiklo nga gimaneho ni Miguel Baricuatro, 30.

Matud ni SPO2 Lorenzo Mahilum, assistant chief sa Pinamungajan Traffic Division, nga nadasmagan ni Baricuatro, taga Barangay Camugao, si Benoya dihang nitabok sa dalan hinungdan nga nalamba ang duha ug nakaangkon og samad sa nagkadaiyang parte sa kalawasan. (/GMR)(BANAT NEWS)