Biyahe sa traysikol sa Airbase bahigon

CEBU, Philippines - Bahinon sa duha ka grupo ang mga traysikol nga magbiyahian sulod sa Mactan Benito Ebuen Air Base sa dakbayan sa Lapu-Lapu alang sa seguridad sa base militar sa Philippine Air Force. Matud ni Col. Antonio Ramon Lim, deputy wing commander sa 560th ug kasamtangang base commander, nga nahinabi sa Banat News nga ang ilang gihimo mao ang pagmintinar sa seguridad sulod sa base sama sa pagsusi sa mga sibilyan nga mosulod sa base. Gumikan niini bahinon sa duha ka grupo ang mga mobiyaheng traysikol diin ang usa ka grupo sa sulod lang sa base mamasahero ug dili makagawas nianang adlawa. Samtang ang laing grupo mobiyahe sa gawas nga bahin sa base ngadto sa merkado ug dili makasulod sa base nianang adlawa.

Sa sunod adlaw magbaylo ang grupo sa pagpamasahero sulod ug gawas sa airbase.

Sa maong pamaagi, tanang pasahero mokanaug gyud sa gate alang sa inspection ug verification kung kinsa ug asa ang tuyo niini sulod sa base.

Usa ka tigum ang napahigayun na sa niaging buwan tali sa mga drayber ug operators samtang laing tigum ang gikatakda pa nga ipahigayun.  (/GMR)(BANAT NEWS)