Bag-ong hepe sa Waterfront nipasalig og kabag-ohan

CEBU, Philippines - Gipasalig sa bag-ong hepe sa Waterfront Police Station sa dakbayan sa Sugbo ang paghimo og kausaban alang sa pagpatunhay sa kalinaw ug kahusay sa lugar.  Matud ni P/Insp. Wayne Magbanua, kanhi deputy for operations sa City Intelligence Branch sa Cebu City Police Office, nga dakung hagit alang kaniya ang bag-o niya nga katungdanan apan andam siya moatubang niini.

Nag-unang plano ni Magbanua ang pag-estorya sa mga opisyal sa kabarangayan sa iyang area of responsibility aron mapalig-on ang pagtinabangay.

Apil usab sa iyang programa nga kanunay nga pagpatrolya sa kapulisan sa mga lugar nga dunay mga gikatahong kaso sa pagpanulis ug pagpangawat.

Samtang nanawagan si Magbanua sa katawhan ubos sa iyang area of concern nga makig-alayon kanila kung dunay gustong ipaabot sa kapulisan. Dugang niya nga iyang himoon ang tanan nga mahimo aron matagaan og serbisyo ang katawhan ubos sa Waterfront Police Station (Station 3). Si Magbanua nalakip sa ikatulong hugna sa lahugay sa mga opisyal sa kapulisan sa dakbayan sa Sugbo sulod niining buwan sa Mayo. Gihimo ang paglahugay sa mga Police Station commanders sa dakbayan human migawas ang taho nga pagsaka sa krimen sa sayong bahin ning tuiga. (/GMR)(BANAT NEWS)