PLDT: Action agad!

CEBU, Philippines - Dia mi sa Sitio Canaas , tunga-tunga sa mga subdivision sa Guadalajara ug Buena Hills, Barangay Guadalupe ning dakbayan. Sulod sa dugay nang panahon, walay ngalan ang among dalan diri, hangtud nga nabutangan kini’g karatola nga 6th Street, ikaunom nga dalan o eskina gikan sa Guadalajara (right side from V. Rama Ave. going to Buena Hills).  Sa ato pa, ang among address karon: 6th St., Guadalajara, Guadalupe, apan, dili mi sakop o sulod sa Guadalajara subdivision. Mahimo tingali 6th St., Citio Canaas.  Apan lisud tultolon tungod kay daghan man konong sitio Canaas sa Guadalupe.

Anyway, duna mi posti diri sa VECO nga naka-pose og traffic hazard ug inconvenience sa mga motorista. Dunay portion sa among dalan nga apiki kaayo, nga maglisud mi kun dunay kasugat, di mi kapadaplin og maayo gumikan sa posti. I wrote VECO and we were told nga dili nila ma-removed ang posti tungod sa mga linya sa telefono.  I wrote PLDT May 9, a Friday, ug pagka-Martes miari dayon si Engr. Dodong Cruz, Staff Engineer sa PLDT-Jones Area (Don S. Osmena Blvd), nag-survey sa lugar.

Nabalik siya pagka-Sabado, ug matud niya gi-aprobahan dayon sa top Management ang  request, gani, misugot nga mag-overtime pagkaugma, Domingo.

Tuod man, ang CQM Falco Contractor maoy nagtrabaho.  Dali rang nahuman, ila pang giapil ang pag-remove sa posti. Sa ato pa, waa nay poblema ang VECO.  Nakaingon ko nga,  “dali ra man diay nga pila na to ka tuig problemaha.”  Daku ang among pasalamat kanila ni Reuben Hinagdanan, Head Operation ug sa ilang manager, si Sir Bong Lintag, kinsa namahayag nga ang ila karong thrust mao ang paghatag og immediate nga pagtagad sa mga hangyo ug yango-ngo sa ilang mga subscriber.

Lagmit tinuod ni kay usahay duna mi problema sa linya sa telefono o sa internet, dali ra man silang motubag. Usahay lang, lately, i-refer ta nila sa Manila … mao nga mabawo sad ta’g Tinagalog. In this particular instance, ang Manila maoy nakasulbad sa among problema sa cordless nga phone ug sa internet mismo.  At any rate, makita hinoon nato ang paningkamot sa PLDT pag-improve sa ilang services.

* * *

Sa column ni Fr. Jerry Orbos, SVD sa Inquirer, iyang gisugilon ang mahitungod sa usa ka naglibog nga anak, nangutana ngadto sa iyang amahan, nga kun duna konoy bad politician nga malumos sa river, unya di makit-an ang lawas … unsa konoy mahitabo? Tubag sa amahan: “Son, there would be pollution.”  “Kun ang tanang bad politician malumos, ug di gyud mapalgan ang ilang mga lawas, unsa may mahitabo?”, laing pangutana sa anak. Tubag sa amahan: “Son, that would be the solution.” Solution sa unsa man? Solution sa grabe ug lapad nga pollution sa sapa, o solution sa naghitak nga corruption sa nasud karon?

Imagine, P10 billion pork barrel scam. Kini sa pork barrel lang. Ang uban pang mga scam?  Naa pay smuggling. Sa uban pa ni nga mga nasud, daghan na ang nang-resign. Dinhi sa ato, denial dinhi, denial didto. Kun motuo ta sa ilang mga denials, walay sad-an nila.

Diin diay kaha paingon ang P10 billion? (BANAT NEWS)