Mga bombero miapil ‘sab sa Brigada Eskwela

CEBU, Philippines - Gawas sa kapolisan, mga bombero ug opisyal sa kabarangayan, miapil usab sa pagpahigayon og Brigada Eskwela didto sa mga tunghaan sa dakbayan sa Mandaue kagahapon.

Si  Dr. Virginia Zapanta nga maoy school superintendent sa Deparment of Education (DepEd) Mandaue City Division maoy nangulo sa mga magtutudlo ug mga ginikanan nga nanglimpyo ug miayo sa mga nangaguba nga lawak saringan sa kabataan.

Kadaghanan sa mga ginikanan sa kabataan nga nagpa-enroll sa mao nga tunghaan misalmot usab sa Brigada Eskwela.

Si Konsehal Ernie Manatad, presidente sa Association of Barangay Councils (ABC) sa Mandaue, nangulo sa mga barangay opisyal sa Subangdaku pagsalmot sa kalihukan sa DepEd. Gipakita usab sa mga ginikanan sa nahisgutang lugar ang ilang paghiusa sa pagtinabangay pinaagi sa pagpakita sa ilang kakugi pag-ayo sa nangaguba nga mga atop, bobong, bentana, mga sira sa pultahan ug uban pa. Ang Subangdaku Elementary School maoy giila nga labing maayo nga magpahigayon og Brigada Eskwela sa mga publikong tunghaan sa Mandaue kay kaniadto nakadawat sila og pasidungog gikan sa DepEd.

Mga ginikanan sa kabataan motabang gayud sa pag-andam sa lawak saringan sa ilang kabataan.

Si Chief Inspector Romulo Samuel Panilagao nga maoy hepe sa Police Community Relation (PCR) sa Mandaue City Police Office (MCPO) miingon nga nagdistino sila og mga polis sa matag tunghaang publiko sa dakbayan aron usab pagpatunhay sa kalinaw.

Si Fire Officer 1 Julius Cabatingan miingon nga lakip sa ilang gihimo pagsalmot sa Brigada Eskwela mao ang pagseguro nga luwas ang mga bata kun adunay mahitabong sunog o kaha linog. (/RUB)(BANAT NEWS)